Последната измена на Законот за платите на судиите се објави во „Службен весник на РСМ“ бр. 39/2026. Со измената се намалија коефициентите за пресметување на плата.
Намалените коефициенти започнаа да се применуваат со исплата на платата за месец февруари 2026 година.
Во „Службен весник на РСМ“ бр.7 7/2026 се објави Одлука на Уставен суд со која се укина оваа измена на Законот за платите на судиите. Оваа одлука произведува правно дејство од денот на објавувањето во „Службен весник на РСМ“, односно од 9 април 2026 година.
Според оваа Одлука на Уставниот суд, при пресметка на платите ќе се користат следниве коефициентите кои важеа до последната измена на Законот за платите на судиите: Согласно член 7 од Законот, коефициентот за утврдување на платата на судиите изнесува од 2,15 до 2,84.
Коефициентите се определуваат според видот на судот во кој судијата работи и според сложеноста на задачите и овластувањата за извршување на дополнителните работи утврдени врз основа на закон:
а) во првата група - судиите и претседателите на судовите со основна надлежност коефициентот изнесува за:
- судија 2,15 и
- претседател на судот 2,30;
б) во втората група - судиите и претседателите на судови со проширена надлежност, коефициентот изнесува за:
- судија 2,23 и
- претседател на судот 2,46;
в) во третата група - судиите и претседателите на апелационите судови, и судиите во специјализираното судско одделение во Основниот суд Скопје 1 Скопје надлежно за судење на дела од областа на организираниот криминали корупција за целата територија на РМ, коефициентот изнесува за:
- судија 2,46 и
- претседател на судот 2,69;
г) во четвртата група - судиите и претседателот на Управниот суд, коефициентот изнесува за:
- судија 2,53 и
- претседател на судот 2,76;
д) во петтата група - судиите и претседателот на Вишиот управен суд коефициентот изнесува за:
- судија 2,58 и
- претседател на судот 2,8 и
ѓ) во шестата група - судиите и претседателот на Врховниот суд на РМ коефициентот изнесува за:
- судија 2,61 и
- претседател на судот 2,84.
На претседател на суд во кој има над 50 судии коефициентот на плата изнесува 2,61.
На претседател на оддел и одделение, утврдениот коефициент се зголемува за 0,2.
На претседател на совет утврдениот коефициент се зголемува за 0,1.